Шымкент қаласы, Қаратау ауданы Полиция басқармасының ювеналды полиция инспекторларының ұйымдастыруымен аудан әкімшілігі, прокуратура, жастар орталығының өкілдерімен бірлесіп Қаратау аумағындағы аулаларда, саябақтарда, жастар көп жиналатын ойын-сауық орындарында рейдтік іс-шара жүргізілді.
Қалалық Полиция департаментінің баспасөз қызметі берген мәліметке сәйкес, рейд барысында ювеналды полиция қызметкерлері ҚР ӘҚтК-нің 132-бабы (Кәмелетке толмағандардың түнгi уақытта ойын-сауық мекемелерiнде болуына жол беру) бойынша - 2, ҚР ӘҚтК-нің 442-бабы 1-бөлігімен (Кәмелетке толмағандардың түнгі уақытта заңды өкілдерінің еріп жүруінсіз сағат 22-ден таңғы 6-ға дейін ойын-сауық мекемелерінде болуы) - 1, ҚР ӘҚтК-нің 442-бабы 2-бөлігімен (Кәмелетке толмағандардың заңды өкілдерінің еріп жүруінсіз тұрғынжайдан тыс жерде сағат 23-тен таңғы 6-ға дейін болуы) - 6 хаттама толтырып, жасөспірімдердің ата-аналарын әкімшілік жауапкершілікке тартты.
"Бейімдеу орталығына 5 жасөспірім жеткізілді. Сондай-ақ, кафе мен дүкендердің иелеріне кәмелет жасына толмағандарға спирттік ішімдіктер және темекі өнімдерін сатуға болмайтынын ескертіп, профилактикалық жұмыстарын жүргізді" делінген ведомство хабарламасында.
