Үшінші мегаполиске келген жұмыс тобын ҚР Премьер-Министрінің орынбасары Гүлшара Әбдіқалықова бастап келді. Үкіметтік топ қалалық орыс драма театры ғимаратында қала тұрғындарымен кездесу өткізді. Бұл туралы Шымкент қалалық ресми сайты хабарлады.
- Шымкент қаласының әкімі Ғ.Әбдірахымов ашып, жүргізген жиынға ҚР Еңбек және халықты әлеуметтік қорғау министрі Б.Сапарбаев, Білім және ғылым министрі К.Шамшидинова, Денсаулық сақтау вице министрі Л.Ақтаева және көп балалы аналар, аз қамтылған отбасылар мен мүмкіндігі шектеулі азаматтар, бюджеттік ұйымдардың қызметкерлері - барлығы 500-ден астам адам қатысты.
ҚР Премьер-Министрінің орынбасары Гүлшара Әбдіқалықова өз сөзінде Елбасының "Әлеуметтік қамсыздандыру" жаңа әлеуметтік шараларының іске асырылу барысы туралы хабардар етті.
Одан кейін сөз алған ҚР Еңбек және халықты әлеуметтік қорғау министрі Б.Сапарбаев ведомствоның халықтың табысын арттыру және аз қамтамасыз етілген отбасыларды қолдау бойынша қабылдаған шаралар туралы айтты,- делінген ресми сайтта.
Кездесу кезінде жұмыс тобының мүшелері залдағы қала тұрғындарының сұрақтарына жауап берді. Кездесу соңында ҚР Премьер-министрінің орынбасары Гүлшара Әбдіхалықова 11 көп балалы отбасыға "Нұрлы жер" мемлекеттік бағдарламасы аясында салынған жаңа пәтерлердің кілттерін табыстады.
Күннің екінші жартысында үкіметтік топ Түркістан облысына шықты.
