01 наурыз, 14:30
Шымкентте Қаратау аудандық сотында клиенттерден "судьяларға пара үшін" ақша жинаған адвокат көмекшісі 7 жылға сотталды. Айта кетейік, сот үкімі оқылған 31 жастағы азамат Шымкенттегі адвокаттар кеңсесінде көмекші боп жұмыс істеген.
Тергеу кезінде сотталушы адвокаттың көмекшілігі қызметін және клиенттердің құқықтық сауатсыздығын пайдаланып құзыреті жетпейтін болса да құқықтық қызметтері үшін аса ірі мөлшерде ақша жинаған. Алданып, соттта жеңіліп қалған клиенттеріне тағы да үстемақы беру керектігін айтып, "судьялар үшін" тағы да қомақты сыйақы сұрап алып отырған. Бірақ шикілікті сезіп, әбден сандалған клиенттер бірден ҰҚК-нің департаментіне сан соқтырған адвокат көмекшісінің үстінен арызданған. Талайды тақырға отырғызды деп айыпталған 31 жастағы жігіт ақша алу үстінде қолға түскен. Бірақ сот тергеуі кезінде сотталушы өз кінәсін ішінара ғана мойындаған. Ақшаны "судьялар үшін" алмағанын, тек өз қажеттілігі үшін жаратпақ болғанын мәлімдеген. Сот 31 жастағы О.А-ны алаяқтық және пара беруге арандатушылық үшін кінәлі деп танып, 7 жылға темір торға тоғыту туралы үкім шығарды.
"Сотталушы ҚР ҚК-нің 190-бабының 2-бөлігі 2-тармағымен, 367-баптың 3-бөлігі 3-тармағымен кінәлі деп танылып, 7 жылға сотталды. 10 жылға құқықтық қызмет көрсету құқығынан шеттетілді",-деді сот ісін қараған Қаратау аудандық сотының төрағасы Ермахан Рахманберді.
Автор:
Жанна Шоман
