Бұл – мегаполистегі алғашқы көп функционалды орталық. Мұнда интернет-кафе, физиологиялық кабинет, кинозал, кітапхана, жаттығу залы мен йога, үстел теннисі, бильярд ойнау секциялары бар, деп хабарлайды қала әкімдігінің ресми сайтына сілтеме жасай отырып Elitar.kz.
Зейнеткер қариялар мен мүмкіндігі шектеулі жандар, балалар үйінің тәрбиеленушілері белсенді ұзақ өмір сүру орталығында бос уақыттарын өткізіп, денсаулықтарын жақсарта алады. Зейнеткерлерге тегін әлеуметтік және медициналық қызмет көрсетіледі.
«Қоғамның дамуы қарияларымызға көрсетілетін қамқорлықтан байқалады. Жылдың басындағы есептік кездесуде қала тұрғындарының бірі менен Шымкенттен қарт кісілерге өмір салтын жақсартып, дене шынықтыруға арналған орталық ашуды сұранған болатын. Міне, бүгін осы орталықты ашып отырмыз. Зейнеткерлер мен қариялар бұл орталыққа отбасымен, балалары және немерелерімен келе алады. Шымкенттегі бұл алғашқы орталық Елбасы Нұрсұлтан Әбішұлы Назарбаевтың отандастарымыздың өмір сүру жасын ұзарту мен бұқаралық спортты дамыту бойынша тапсырмасы аясында ашылып отыр. Айта кетейік, шымкенттіктердің өмір сүру жасы ұзарып келеді. Мегаполис тұрғындарының қазіргі таңдағы орташа жасы 78 жастан асады.»деді қала әкімі Ғ.Әбдірахымов.
Бұл күні зейнеткерлерге арнап концерттік бағдарлама қойылып, қариялар би биледі. Айта кетейік, бұл орталықта 70-ке жуық қария үшін тәуліктің күндіз 4 сағат арнаулы әлеуметтік және медициналық қызметтер көрсетіледі.
