Шымкентте бір мезетте ұсталған әкімшілік полиция басқармасының 38 қызметкеріне қатысты жаңа дерек шықты

Бірден 38 сотталушы жауапкершілікке тартылған іс бір жарым мың томнан асық қатталған. Ұйымдасқан қылмыстық топ пен жемқорлыққа қатысты айыпталғандар ісінде 1900 куәгер тыңдалуы тиіс. Оның 400-ге жуығы Қазақстанның әр аймағында тұрады. Сондықтан да бейнебайланыс арқылы тыңдауға тура келеді. Сотталушылардың өздеріне әлі өз кінәсін мойындайтыны не мойындамайтыны белгісіз. Өйткені, оларға сотта сөз кезегі келмеген. Айыпталушы 38-дің адвокаттары куәгерлерден соң сөз алуға сұраным хат жазған көрінеді.

Еске салсақ, бұл қылмыстық іс осыдан үш жыл бұрын басталған болатын. 2016 жылдың шілде айында облыстық ІІД әкімшілік полициясының тіркеу-емтихан бөлімінде арнайы операция жүргізіліп, нәтижесінде басшысынан бастап қызметкерлері ұсталған. Қылмысқа қатысы бар деген күдікпен 2017 жылдың шілде айына дейін Сайрам, Бәйдібек, Мақтаарал, Сарыағаш аудандары мен Түркістан қалалық ішкі істер басқармаларының қызметкерлері құрықталған еді.

Айыпталушылардың арасында 2015 және 2016 жылы зейнеткерлікке шығып кеткен полиция қызметкерлері де бар көрінеді. Екі жылдан аса уақыт жүргізілген тергеу кезінде ұсталғандарға ұйымдасқан қылмыстық топ құрып, оған жетекшілік етті, пара алды және берді, қызмет бабын асыра пайдалана отырып, сыбайлас жемқорлық қылмыстарын жасады деген айыптар тағылды.

Бұрынғы полиция қызметкерлеріне қазақстандық және ресейлік жалған нөмірлер мен мөрлер жасады, оны пайдаланды және жәбірленушілерге миллиардтаған теңге шығын келтірді деген кінә тағылуда.

Сот процесіне төрағалық етуші судья Әбсаттар Шахидиновтың айтуынша, әлі куәгерлер толық тыңдалып аяқталмаған.

"Бұл істің сотта қаралып жатқанына жарты жылдан асық уақыт өтті. Екі жылдай сотқа дейінгі тергеп тексеру органдары қараған. Әлі куәгерлер тыңдалып жатыр. 400-ге жуық куә Қазақстанның басқа аймағында тұратындықтан бейнебайланыс арқылы тыңдаймыз"-дейді Шымкент қалалық қылмыстық істер жөніндегі мамандандырылған ауданаралық сотының төрағасы Әбсаттар Шахидинов.