Шымкенттегі ЭКО, медицина тілімен айтқанда «экстрокорпаральді ұрықтандыру» арқылы жүкті болған әйелдер енді жүйелі ем-дом алу үшін сан-саққа сабылмайды. Әдеттегідей алып шаһар тұрғындары Алматыға да аттанбайтын болды. Бұл үшін үшінші мегаполисте арнайы бөлімше ашылды, деп хабарлайды Elitar.kz тілшісі.
Шаһар аумағындағы №2 қалалық ауруханасының жанынан жүкті әйелдерді емдеуге арналған арнайы патология бөлімшесі қызметін бастап отыр. Жаңа орталықта дәрігерлер жүктіліктің 34 аптасынан бастап аяғы ауыр келіншектерді түрлі патологиялар бойынша бақылауда ұстайды. Яғни, бөлімшеде ЭКО арқылы жүкті болған, мерзімінен асқан жүктілік, артериалдық гипертензияның орта дәрежесі, жеңіл преэклампсия, анемияның ауыр дәрежесі, гестациялық қант диабетінің компенсация сатысындағы жүкті келіншектірді емдейді.
