Үкімет отырысы кезінде баяндама жасаған Денсаулық сақтау министрі Елжан Біртанов коронавирус бойынша елдегі эпидемиологиялық ахуалға тоқталды. Бүгінгі таңда Алматы қаласы мен Нұр-Сұлтан және Қызылорда облысында коронавирус жұқтырғандар саны басым.
"Өткен тәулікте елімізде коронавирус жұқтырудың 141 жағдайы тіркелді. Өсім деңгейі 8,2 процентті құрады. Ең көп науқас Алматы қаласында – 82 адам және Шымкентте – 23 науқас тіркелді. Алматы қаласында тіркелген 82 науқастың 78-і жоспарланған скрининг тесттің негізінде анықталды. Олардың 60-сы орталық қалалық клиникалық аурухананың ішіндегі науқастар мен медициналық қызметкерлер. Шымкентте тіркелген 23 науқастың 16-сы скрининг бойынша анықталған науқастар, олар төтенше жағдай департаментінің қызметкерлері. Қалғандары емделіп жатқан пациенттер мен карантинде жатқан азаматтар», - деді министр Біртанов.
