Былтыр Шымкентте сыбайлас жемқорлық қылмысын жасаған 100-ге жуық адам анықталып, оның 85-інің ісі сотқа жолданды, деп хабарлайды Elitar.kz тілшісі.
Бұл туралы Мемлекеттік қызмет істері және сыбайлас жемқорлыққа қарсы іс-қимыл агенттігінің Шымкент қаласы бойынша департаменті өкілдері мәлімдеді. Сондай-ақ, мониторингті саралай келе құзырлылар ішкі істер саласы қызметкерлерін парақорлыққа аса бейім деп танып отыр. Себебі былтырғы жылдың еншісіндегі қылмыстардың көпшілігі тәртіп сақшыларына қатысты болды дейді жауаптылар. Қылмыстық-атқару жүйесі, қаржы, ауылшаруашылығы, денсаулық сақтау саласы мамандары да парақорлықтан алыс емес екені белгілі болды. Департамент мәліметіне қарағанда, жемқорлық қылмыстарының дені пара беруге қатысты орын алған. Онымен қоса пара алу, алаяқтық деректері де осы санаттағы қылмыстардың басым бөлігін құрайды.
