"Нұротандықтардың" тексеруінен кейін де Шымкенттегі мамандандырылған халыққа қызмет көрсету орталығында еш өзгеріс жоқ. Халық сағаттап кезек күтеді. Ал делдалдар тіпті айылын жияр емес.
Ашықтан ашық түрлі қызмет ұсынып, пайда табатындарды мұндағы таксистер де жақсы біледі. Өзін Қанат деп таныстырған бұл азамат бізге көлік жүргізі куәлігін де сақтандыру мен техникалық қадағалау құжаттарын рәсімдеуге көмектесетінін айтты. Айтуынша "тірлікті тас-түйін тындыратын" танысы осы маңайда отырады екен.
Жүргізуші куәлігін алу үшін ешқандай оқудан өтудің қажеті жоқ екенін айтқан ол бізден тіпті көлікке қатысты құжаттарды жасауға қажетті қаражат мөлшерін де жасырмады. Оның айтуына қарағанда ең қымбаты - темір тұлпарды тізгіндеуге құқық беретін құжат болыпты шықты.
Айта кетейік, бас партияның назарына іліккен орталыққа жуырда Шымкент қалалық филиал төрағасының бірінші орынбасары Бахадыр Нарымбетов арнайы бас сұққан болатын. Кей қызметтерді 5 мың теңгеге бағалайтын делдалдар мұнда сыбайлас жемқорлыққа емін-еркін жол беріп отыр деген болатын.
