Шымкенттегі оқушылардың жаппай улануы: Оқиғаны қала әкімі өз бақылауына алды

19 наурыз, 14:30

Күні кеше Шымкент қаласындағы №54 орта мектепте белгісіз иістің әсерінен жаппай улану фактісі орын алған болатын.

Бүгін осы мектепке тиісті сала жетекшілерімен бірге Шымкент қаласының әкімі Ғ.Әбдірахымов келіп, орын алған төтенше жағдайдың шығу себептерін анықтау жөніндегі жұмыстардың атқарылу барысымен танысты, деп хабарлайды әкімдіктің баспасөз қызметі.

Қала әкімі мектепті толық аралап шығып, Ынтымақ шағын ауданындағы газ тарату пуктінде болды.

Мамандар мектеп іші мен сыртындағы ауаның сынамасын алып, лабороториялық тексеруден өткізді. Табиғи газдың таралуы жөніндегі болжам расталған жоқ.

Мектептің санитарлық ахуалы қалыпты, адам денсаулығына келер қауіп жоқ. Оқиғаның мән-жайын анықтау жөніндегі жұмыстар одан әрі жалғасады.

Мектеп 20 наурыздан бастап өз жұмысын жалғастыратын болады. Білім ошағында тиісті сала мамандарынан тұратын кезекшілік бекеті қойылған.

Жағдай қала әкімінің тұрақты бақылауына алынған.

Айта кетейік, төтенше жағдайдың салдарынан улану белгілері бар 45 адам қалалық №6 емхананың токсикология бөліміне жеткізілген еді. Оларға медициналық көмек көрсетіліп, жағдайлары жақсарғаннан кейін үйлеріне жіберілді. Зардап шеккендерге тұрғылықты мекенжайы бойынша учаскелік дәрігерлер бекітілді.