Бүгін таңертеңгілік уақытта Шымкенттегі Забадам шағынауданында орын алған артиллериялық снаряд жарылыс салдарынан екі адам зардап шекті. Оның бірі 1984 жылғы ер кісі. Жансақтау бөліміне түскен ер кісіге дәрігерлер қолдан келген барлық мүмкіндікті жасаған. Қалалық денсаулық сақтау басқармасы баспасөз қызметінің мәліметінше, зардап шегушінің бір қолының шынтақтан, бір аяғының тізеден төмен тұсынан бастап кесіп тастауға тура келген. Себебі алынған жарақат салдары өте ауыр болған. Қазір де науқастың жағдайы ауыр. Зардап шеккен екінші науқас - 1998 жылғы дүниеге келген ер азаматқа алғашқы хирургиялық ем көрсетілген, қазіргі таңда жағдайы бірқалыпты.
Көптің зәресін алған төтенше жағдайға қатысты ҚР ІІМ өкілі Алмас Садубаев ресми мәлімдеме жасады. Айтуынша, жарылыс снарядты арамен кесу салдарынан орын алған. Зардап шегушілер оны металл қабылдау орнына өткізбек болыпты. Қазіргі таңда оқ-дәрілердің қайдан алынғанын анықтау шаралары жүріп жатыр. Бұл оқиғаға қатысты Қылмыстық кодексінің 287-бабы бойынша іс қозғалып, тергеу амалдары жүріп жатыр.
