Бұл туралы Шымкент қалалық денсаулық сақтау басқармасының баспасөз қызметі хабарлады.
Оқиға 18 наурыз күні болған. Сол күні сағат 20.54-те жедел жәрдем станциясына 2 айлық баланың тұншығып қалғандығы туралы хабарлама келіп түскен.
Белгілі болғандай, оқиға болған күні екі айлық сәбиді анасы емізіп болған соң кереуетіне жатқызып, үй шаруасымен айналасып жүрген. Кейін қайта айналып келгенде кереуетте ес түссіз жатқан баласын байқап, дереу 103-ке хабарласқан.
"Құрамында 9-шы бригаданың дәрігері А. Тастанова және фельдшер Ж.Жанәке шұғыл шақыртуға барып, сәбиге реанимациялық көмек көрсетті.
Тексеру кезінде сәбидің жүрек қағысы байқалмаған. Әрі ес түссіз халге түсіп,терісі көгерген. Сәтті жасалған реанимациялық көмектің арқасында екі айлық сәбидің жүрегі соғып, жедел жәрдем қызметімен қалалық балалар ауруханасына жеткізілді",-деді денсаулық сақтау басқармасының баспасөз қызметіндегілер.
Шұғыл медициналық көмек көрсетіліп, алты күн бойы сәби ауруханада қажетті емді алған соң үйіне қайтарылған.
