Шымкенттік полицейлер ерлікпен қаза тапқан Шалқар Ақымғалиевті еске алып, тағзым жасады, деп хабарлайды департаменттің баспасөз қызметіне сілтеме жасай отырып Elitar.kz.
Шымкент қаласы Полиция департаментінің ғимаратында 21 наурыз күні Атырауда қызды құтқарам деп өз өмірін қиған полиция сержанты Шалқар Ақымғалиевтың құрметіне арналған еске алу салтанатты жиыны өткізілді. Департамен бастығы, полиция полковнигі Ералы Жұмаханбетов кіріспе сөз айтып, ерлікпен қаза тапқан полиция сержанты Ақымғалиев Шалқардың отбасына қайғыларына ортақтасып, көңіл айтты.
Патрульдік полиция полкінің қызметкерлері үндеу тастап, Ш.Ақымғалиевтің отбасына Шымкент қаласы Полиция департаментінің жеке құрамы тарапынан материалдық көмек көрсетілетін болды.
Жиын соңында Шымкент қаласы Полиция департаментінің қызметкерлері Шалқар Ақымғалиевке арнап шынар ағашын отырғызды.
Айта кетейік, атыраулық полиция сержанты Шалхар Ақымғалиев көпбалалы отбасыда тәрбиеленген. Үйленбеген. Шалхар отбасының жалғыз асыраушысы болған. Ішкі істер органдарында 5 жыл жұмыс істеген. Бүгін, 1 сәуірде Шалхар 25 жасқа толар еді.
