14 мамыр, 15:30
Сириядан оралған 33 жастағы қазақстандық келіншек ҚР Сыртқы істер министрлігінде өткен брифинге қақтығыс аймақтарындағы әйелдердің көрген қиындықтары туралы айтып берді, деп хабарлайды Elitar.kz.
Жақында Сириядан 231 Қазақстан азаматының елге жеткізілгенін жазған болатынбыз. оның 156-сы — балалар, дені мектеп жасына дейінгілер, соның ішінде 18-і — жетім балалар.
«Бұл ауқымды гуманитарлық акция — Тұңғыш Президент — Елбасы Нұрсұлтан Назарбаевтың тапсырмасымен биыл қаңтар айында жүргізілген «Жусан» операциясының жалғасы», — деген болатын Мемлекет басшысы өз мәлімдемесінде.
Жусан – сыртта жүрген қандастардың отанға деген сағыныштың рәмізі.
Елге оралған келіншектің айтуынша, ондағы әйелдер күнкөріс көзінен қағылған. Ерлері қаза болғаннан кейін оларға ақша беру тоқтатылып, жесірлер тағы да күйеуге шығуға мәжбүр болатын көрінеді. Сырқаттанып қалса да үйден рұсатсыз шығуларына болмайды.
«Амал жоқ басқа күйеуге шығуға мәжбүр боласың. Себебі қиындықтарды әйелдер амалсыздан күйеуге шығуы үшін әдейі жасап қойған. Күйеуге шықпасаң, аштан өлесің. Ал күйеуге шыққанымен, ол адам 2-3 күннен кейін қайтыс болу мүмкін. Осындай жағдайдың салдарынан 5-6 рет, тіпті 19 рет күйеуге шығып жатқан әйелдер болды», — дейді Сирияда 4 жыл тұрған келіншек.
Оралғандардың көпшілігі әкелері қайтыс болған немесе із-түзсіз кеткен балалары мен жесірлер.
Қақтығыс ошағынан оралғандарға елімізде әлеуметтік орталықтар психологиялық көмек көрсетеді.
