30 наурыз, 16:21
Түркістан облысы полицейлері төтенше жағдай кезінде тұрғындарға қызмет көрсеткен букмекерлік кеңсе әкімшісін қамауға алды
Созақ ауданының полицейлері ауылдардың бірінде букмекерлік кеңсе адам қабылдап, жұмыс жасап жатқанын анықтады. Мұны анықтаған полицейдің айтуынша, төтенше жағдай жарияланып, тыйым салынғаннан кейін, яғни 18-19 наурыз күндері ойын-сауық орындарының жұмысы тоқтатылу керек деп, аталған букмекерлік кеңсеге бірнеше рет ескерту жасаған. Алайда букмекерлік кеңсе әкімшісі оған құлақ аспастан 23-наурыз күні адам қабылдап отырғаны белгілі болды.
«Қазақстан Республикасы Президентінің 15.03.2020 жылғы Жарлығының талаптарын өрескел бұзған аталмыш тұрғынға ҚР Әкімшілік құқық бұзушылық кодексінің 476-бабы “Төтенше жағдай режимiн бұзу“ бойынша хаттама түзіліп, аудандық соттың қаулысымен кінәлі деп танылып, 5 тәулікке әкімшілік қамаққа алынды" деп хабарлады Түркістан облыстық Полиция департаментінің баспасөз қызметі.
Осы ретте полицейлер ойын-сауық, сауда орталықтары мен кафе-бар, тойхана иелеріне төтенше жағдай кезінде заң талаптарына сәйкес әрекет етіп, мүмкіндігінше көп адам шоғырлануына жол бермеу керектігін ескертеді.
