Мемлекет басшысы Қасым-Жомарт Тоқаев Түркістанда қонақ үйде орын алған өрттен зардап шеккен ІІМ қызметкерлері мемлекеттік наградаға лайық екенін атап өтті. Бұл туралы Президент Twitter-дегі парақшасында жазды.
"Түркістандағы қонақ үйде болған өрттен зардап шеккен ІІМ қызметкерлерінің тез сауығып кетуін тілеймін. Олардың ерен еңбектері мемлекеттік наградаларға лайық" делінген Мемлекет басшысының жазбасында.
Еске салсақ, 10 қыркүйекте Түркістан қаласында шамамен сағат 18.25-те "Роял-гранд"қонақ үйінде өрт шықты. Оқиға орнына келген облыстың ТЖД қызметкерлері мен полиция қызметкерлері жақын маңдағы аумақты қоршап алып, қонақ үйдің қонақтары мен қызметкерлерін дереу эвакуациялауға кіріскен болатын. Құтқару жұмыстарын жүргізу барысында 50 адам эвакуацияланды.
Өрт сөндіру кезінде Түркістан облысы ТЖД-нің 5 қызметкері зардап шекті, олар түрлі дәрежедегі күйік пен жарақат алған болатын. Қазіргі таңда олар орталық ауруханада. Жағдайлары жақсы. Өмірлеріне төніп тұрған қауіп жоқ.
Түркістан қалалық полиция басқармасының тергеушілері төтенше жағдай бойынша ҚР ҚК-нің 292-бабына сәйкес сотқа дейінгі тергеп-тексеру амалдарын жүргізуде. Сараптама тағайындалды.
