Пара алды деген күдікпен ұсталғандардың қатарында Мақтаарал ауданындағы мектеп директоры да бар. Ол еден жуушы, аула сыпырушы ретінде әлдекімді жұмысқа қабылдауға уәде етіп, пара сұраған.
Түркістан облысында бірқатар лауазымды азамат пара алды деген күдікке ілініп отыр. Олардың ұсталған сәтінің видеосын Сыбайлас жемқорлыққа қарсы күрес қызметі YouTube каналында жария етті, деп хабарлайды Elitar.kz.
Белгілі болғаны, ұсталғандар Түркістан облысындағы қорғаныс істері және білім беру ұйымдарында қызмет еткен лауазымды тұлғалар болып шықты.
Ведомство мәліметінше, олардың барлығы бір күнде ұсталған. Атап айтқанда, Түркістан облыстық қорғаныс істері жөніндегі Отырар аудандық тобының басшысы ҚР Әскери борышын өтеуді кейінгі қалдыру үшін 80 мың теңге, Жетісай ауданында № 15 колледж директоры еңбек келісімін созу үшін 250 мың теңге пара алды деген күдікке ілінді. Ал Мақтаарал ауданында № 34 Бірлік атындағы орта мектептің директоры азаматты жұмысқа (еден жуушы, аула сыпырушы) алу үшін 150 мың теңге пара алған.
Қазіргі таңда бұл фактілер бойынша сотқа дейінгі тергеу шаралары жүріп жатыр.
