Түркістан облысының әкімі Өмірзақ Шөкеев аудан, қалалардың бас имамдарымен кездесті.
Басқосуда дін саласы бойынша пікір алмасып, діни тұрақтылықты нығайту мәселелері талқыланды. Аймақ басшысы дін қызметкерлеріне қоғамдағы тыныштықты сақтаудан бөлек, өңірдің руханиятын арттыруды да қолға алу керектігін айты, деп хабарлайды облыс әкімдігінің баспасөз қызметі.
«Облысымызда насихат жұмыстары жүйелі түрде жүру қажет. Өңірдегі тұрақтылық басты назарда болуы тиіс. Жат ағымдармен күрес жұмыстары толастамау керек. Жалпы алғанда, Түркістан – ілімнің, діннің, тарихтың орталығына айнала бермек. Бұдан өзге, имамдар бабамыз Қ.А.Ясауи туралы білімдерін жетілдіріп, азаматтарға сол туралы түсіндіру жұмыстарын жүргізіп отыруы абзал. Себебі, Ясауидың тарихын кесенеге келген зиярат етушілердің бірі білсе, бірі біле бермейді. Рухани азық алуда халық көбіне сіздерге жүгінеді», – деді аймақ басшысы.
Жиын барысында өңіріміздің кейбір елдімекендерінде мамандардың жетіспеушілігі сезіліп жатқаны айтылды. Бұл мәселені имамдар әлеуметтік мәселелермен байланыстырып отыр.
Жиынды қорытындылаған аймақ басшысы аталған мәселелерді оңды шешу үшін тиісті шаралар қолға алынатынын айтты. Яғни, имамдарға пәтер және оларға жалақы беру мәселесі қаралмақ. Сондай-ақ, қалталы азаматтарға халыққа қажетті әлеуметтік нысандарды салып беру де сауапты іске жататындығын атап өтті.
