Түркістан облысында коронавирус инфекциясын жұқтырған азаматтар саны 47-ге жетті.
Бүгін таңертең COVID-19 диагнозы расталған үш азамат та Жетісай ауданының тұрғындары. Олар: Ш.Ділдабеков ауылдық округінің 1970 жылғы және Достық ауылының 1971 жылғы, сонымен қатар Ынтымақ ауылдық округіне қарасты Өркенді ауылының 1994 жылы дүниеге келген тұрғындары. Аталған азаматтың үшеуі де бұған дейін қауіпті індет анықталған науқаспен жақын байланыста болған.
Қазіргі таңда облыс бойынша вирусты инфекция анықталған 47 тұрғынның 18-і Жетісай ауданында тіркелген. Кентауда - 5, Ордабасы - 2, Сайрам - 2, Мақтарал - 4, Арыс - 14, Сарыағаш - 1, Бәйдібек -1 адамнан коронавирус расталған.
1956 жылы дүниеге келген жетісайлық бір азамат 4 сәуір күні көз жұмды.
Төтенше жағдай жөніндегі облыстық жедел штабтың мәліметінше, барлық науқастардың жағдайы қанағаттанарлық, шағымы жоқ. Вирус жұқтырғандар қазіргі уақытта оқшауланып, тиісті ем қабылдауда. Аталған азаматтармен байланыста болғандарды анықтап, оқшаулау жұмыстары жүргізілуде.
