18 наурыз, 15:35
Түркістан облысы Келес ауданында ауылдасын қамшымен сабап тастады деп айып тағылған сотталушы ақталды. Келес аудандық сотының судьясы С.Кенесованың төрағалық етуімен Қазақстан Республикасы ҚК-нің 107-бабы 1-бөлігімен, яғни, "денсаулыққа қасақана ауырлығы орташа зиян келтіру" бабымен айыпталған Т-ға қатысты қылмыстық іс қаралып аяқталды.
Сотқа дейінгі тергеп-тексеру органдары сотталушы Т-ға қамшының сабымен жәбірленуші Б-ның қолынан ұрып-соғып, алақан сүйегінің орта бөлігінен жабық сынуы жарақатын салып, денсаулығына қасақана орта дәрежелі зиян келтірген, яғни, ҚР ҚК-нің 107-бабы 1-бөлігінде көзделген қылмысты жасады деген айыппен сотқа берген.
Сот қарауы барысында іс бойынша жинақталған дәлелдемелерді жан-жақты және обьективті түрде талдап, оларды бір-бірімен салыстырып, айыпталушы Т-ның қылмысы дәлелденбеуіне байланысты сотталушыны кінәсіз деп танып ақтады.
Бұл ақтау үкімімен келіспеген жәбірленуші апелляциялық шағым келтіріп, мемлекеттік айыптаушы өтініш хат берген көрінеді. Алайда апелляциялық алқаның қаулысымен ақтау үкімі өзгеріссіз қалдырылып, жәбірленуші мен прокурордың хаты қанағаттандырусыз қалдырылған.
Айта кетейік, үкім заңды күшіне енген.
Автор:
Жанна Шоман
