Судья полиция қызметкерлерінен жүйелі түрде пара алып келді деп күдіктеліп отыр.
Түркістан облысы, Сарыағаш ауданында әкімшілік соттың судьясы пара алды деген күдікке ілінді. Бұл туралы Сыбайлас жемқорлыққа қарсы іс-қимыл агенттігі хабарлады.
Түркістан облысы бойынша Сыбайлас жемқорлыққа қарсы қызметі ҚР Жоғарғы Сотының ішкі қауіпсіздік және сыбайлас жемқорлықтың алдын алу бөлімімен бірлесе отырып, Сарыағаш ауданындағы мамандандырылған әкімшілік соты судьясының жемқорлыққа бару фактісін анықтады.
«2019 жылдың 11 желтоқсанында судьяға қатысты сотқа дейінгі тергеуді жалғастыруға Бас прокурор келісім берді. Тергеу шеңберінде судьяның шетел азаматтарының көші-қон заңнамасын бұзғаны туралы әкімшілік материалдарды кедергісіз қарастырғаны үшін Сарыағаш ауданының полиция қызметкерлерінен жүйелі түрде пара алуға қатысы бар-жоғы тексерілуде. Күдіктіге қатысты түпкілікті шешімді сот қабылдайды" делінген ведомство мәліметінде.
