Түркістан облысы полицейлері мал ұрлығы мен ұялы телефон ұрлығын жасаған күдіктіні ұстады, деп хабарлайды облыстық ПД баспасөз қызметіне сілтеме жасай отырып Elitar.kz.
Келес АПБ қызметкерлері жедел-профилактикалық іс-шараның аясында бөтеннің мүлкін жымқырған жергілікті тұрғын, яғни күдіктіні құрықтады. 2019 жылы наурыз айында Келес ауданының мал базарының жанында қараусыз жайылып жүрген, құны 250 000 теңге болатын сиыр ұрланған. Одан кейін күдікті ұрланған малды мал базарға апарып жарты бағасына сатып жібереді. Аталған жайт сотқа дейінгі тергеп-тексерудің бірыңғай тізіліміне енгізіліп, ҚР ҚК-нің 188-бабы «Ұрлық» бойынша тіркелді.
Жедел-іздестіру шараларының нәтижесінде аудандық полицейлер күдіктінің және басқада ұрлыққа қатысы барын анықтады. Күдікті ауданда орналасқан ойынханалардың бірінде, қараусыз жатқан сөмкені көріп, ешкім байқап тұрмағанына сенімді болып, арам ойын жүзеге асырып, сөмке ішіндегі ұялы телефонды жымқырады. Ұрланған телефонды да сатып, ақшасын өз қажетіне жаратады. Жәбірленушіге жалпы келтірілген шығын көлемі 200 000 теңге.
Қазіргі уақытта, ҚР ҚК-нің 188-бабына сәйкес орын алған жайт бойынша сотқа дейінгі тергеп-тексеру амалдары жүргізілуде. Полицейлер айғақты зат ретінде ұрланған мүліктер алып, заңды иелеріне қайтарған.
