Түркістан облысы Полиция департаментінің ресми мәліметіне сүйенсек, 2019 жылдың 4 айында Ішкі істер органдары анықтаған әкімшілік құқықбұзушылықтар туралы Түркістан облысына қатысты мәлімет бойынша автокөлік жүргізу кезінде телефон қолдану – 2296, жылдамдықты арттыру -1933, жолаушы және жүк тасымалдау кезінде қауіпсіздік ережелерін сақтамағандар -4399, қарсы бағытқа шыққандар -103, жаяу жүргіншілерді өткізбегендер -189, жолақтарда жол ережесін бұзу - 2301, жол қауіпсіздігі қатысушыларына ұсынылатын талаптардағы тәртіп бұзушылықтар – 2452, көлікті мас күйінде басқарғандар -249 болып отыр.
2019 жылдың 4 айында 256 жол апаты орын алған. Соның себебінен, 72 азамат көз жұмып, 360-ы жарақаттанған. Әрине оның себеп-салдарын талдай берсеңіз таусылмайды. Кейбіреулер елімізде көлік санының күрт өсуінен десе, енді бірі ой-шұқыры көп жолдан дейді. Ал үшіншілері, әлбетте, көлік жүргізушілерінің салғырттығынан көреді.
Жол-көлік апаттары көбіне көлік жүргізушілерінің кінәсінен, көліктің жолдағы жүру ережелерін қатаң сақтамаудан немесе білмеуден, елді-мекендер мен трассаларда рұқсат етілмеген жылдамдықпен жүргендіктен, арақашықтық сақтамаудан, бағдаршамға бағынбаудан, мас немесе шаршаңқы күйде көлік жүргізуден, автокөлік курсынан толық өтпей және жүргізуде тәжірибесі аз болуы салдарынан болады.
Өз кезегінде облыстық полиция департаменті көлік жүргізушілерін ережелерді орындай отырып, жол жүру кезінде тәртіп сақтауға шақырады.
"Құрметті көлік жүргізушісі өз тарапыңыздан жол жүру, жол қозғалысы ережелерімен мұқият танысып, керек десеңіз жадыңыздан шықпайтындай жаттап алыңыз. Бұл өз кезегінде, орны толмас қайғының алдын алмақ. Темір тұлпарды тізгіндегенде, тәртіп сақтауды басты назарға алайық! Бұл өмірде ең бастысы – адам өмірі!",-делінген ТО ПД баспасөз қызметінің хабарламасында.
