Бұл туралы бүгін Асқар Маминнің Түркістанға жасаған жұмыс сапары барысында Түркістан облыстық ауыл шаруашылығы басқармасының басшысы Нұрбек Бадырақов баяндады, деп хабарлайды Elitar.kz.
Жыл сайын өңірде 180 млн текше метр су жетіспейді. Осыны шешу үшін мамандар төрт жолды қарастырып отыр.
«Сырдария өзенінен келетін канал салу қажет. Сол каналды салу арқылы 37 мың гектар жерді толықтай сумен қамту мүмкін болады. Жобаның құны 14 млрд теңге болады.
Екіншіден, Арыс-Түркістан магистралдық каналының 54 шақырымын жөндеуді қолға аламыз. Осының нәтижесінде 60 млн текше метр суды үнемдейміз.
Үшінші, Қарашық өзені арқылы су қоймадан 73 млн текше метр су келеді. Ол текке ағып кетіп жатыр. Соның 37-сі осы жерге қалады, қалғанына осы жерден жаңа су қоймасын салу керек. Бұған 3,5 млрд теңге қаражат кетеді. Бұл жерде 16 млн текше метр суды қосымша жинайтын боламыз.
Төртіншісі, бұл - жер асты суларын тиімді пайдалану. Бұрын кеңес уақтысында 699 скважина болған. Соның қазір 145-і жарамсыз. Сол скважиналармен қазу арқылы қаланы толығымен сумен қамтимыз.
Бұл 4 жоба да біздің кешенді жоспарға енген. Бюджеттен су қоймасын салуға қаржы бөлінді»,-деді Нұрбек Бадырақов.
Сондай-ақ, облыста халықтың тұрмыс жағдайын жақсарту үшін азық-түлік белдеуін жасау жоспарлануда.
«Қазір мың гектар жерге жаңбырлатып суғару бойынша жүгері, жоңышқа егілген. Тиімділігі жоғары. Келесі жылы Отырар, Кентау, Қызылорда бағытында осы жұмыстар жалғасатын болады»,-деді басқарма басшысы.
Өңірде сондай-ақ, азық-түлік белдеуінде 8 инвестициялық жоба іске асырылатын болады. Жоба кешенді жоспарға енгізілген. Жобаның жалпы құны - 46 млрд теңге.
«Олардың біріншісі: сүт фермасы. Биыл күзге дейін іске қосамыз. Мың бас мал бордақыланады. Жылына 20 млн дана жұмыртқа өндіретін құс фермасы іске қосылмақ, 300 га қарқынды бау, 100 басқа арналған ешкі сүт өнімдері, жылына 20 мың тонна құс етін өндіреміз, 6 мың га жаңбырлатып суғару арқылы өнім аламыз, 300 га өндірістік үлгідегі жылыжай кешенін салу жоспары бар»,-деді облыстық ауыл шаруашылығы басқармасының басшысы Нұрбек Бадырақов
