Тергеушілер Түркістан облысының 40-тан астам тұрғынын алдаған алаяқ әйелге қатысы бар істі сотқа жолдады, деп хабарлайды Elitar.kz.
Ағымдағы жылдың наурыз айында Түркістан қаласының тұрғыны полицейлерге мемлекеттік бағдарлама аясында қомақты қаржы алып беремін деп, ақшасын алған азаматшаға қатысты шағым түсірген. Аталған жайт ҚР ҚК-нің 190-бабы «алаяқтық» бойынша СДТБТ-не тіркеуге алынды.
Қылмысты ашу мақсатында ТО ПД-нің Криминалдық полиция басқармасының қызметкерлері жедел-іздестіру шараларын өткізіп, нәтижесінде Түркістан облысының жұмыссыз жүрген жергілікті тұрғынын құрықтады. Полицейлердің анықтауы бойынша, алаяқ әйел жұмысқа орналастырып беремін немесе мемлекеттен қаржы алып беремін деген жалған уәдемен адамдардың ақшаларын алып отырған. Тергеу барысында күдіктінің алаяқтықтың 41 жайтына қатысы бар екендігі және жәбірленушілерге 1,5 миллионға жуық залал келтіргендігі анықталды.
Қазіргі уақытта азаматшаға қатысты жинақталған мәліметтердің барлығы сотқа жолданды.
