"Стоп-траффик" республикалық жедел-іздестіру іс-шарасы Түркістан облысының полицейлері өңірдегі барлық қонақ үйлерді, сауналар мен моншаларды және басқа да орындарды, интернет-сайттарды, сондай-ақ күдік туғызған қызметтерді тегіс анықтау мақсатында тексеріп шықты. Жұмыс нәтижесі бойынша жеңгетайлық және жезөкшелікпен айналысу үшін притондар ұйымдастырудың 6 жайты тіркелді.
"Аталған жайттар бойынша ҚР Қылмыстық кодексінің 309-бабы "Жезөкшелiкпен айналысуға арналған притондар ұйымдастыру немесе оларды ұстау және жеңгетайлық" бойынша тіркеуге алынып, сотқа дейінгі тергеу амалдары жүргізілуде. Сондай-ақ, полиция қызметкерлері жеңгетайлықпен айналысатын 5 тұлға мен жеңіл мінез-құлқындағы 12 қызды есепке алды",-деді ТО ПД баспасөз қызметіндегілер.
Атап айтқанда, Сарыағаш ауданында жергілікті тұрғын құрықталды. Ол қонақ үйдің әкімшісі болып жұмыс істеп, жеңіл мінез-құлықты қыздарды қызметін сыйақы ұсына отырып, жеңгетайлықпен айналысқан. Тәртіп сақшылары ұсталған күдіктіден ақша және басқа да айғақты заттар тәркіледі. Бұл жайт ҚР ҚК-нің 309-бабы "Жезөкшелiкпен айналысуға арналған притондар ұйымдастыру немесе оларды ұстау және жеңгетайлық" бойынша СДТБТ-ға тіркелді. Сотқа дейінгі тергеу амалдары жүргізілуде.
