Әзірге мұндай көмек алушылар тізіміне әлеуметтік жағдайы төмен және көпбалалы отбасылар енген.
Түркістан қаласында әлеуметтік жағдайы аз қамтылған отбасылар үшін «Тегін – қайырымдылық дүкені» өз жұмысын бастады. Бұл дүкен облыстық ақсақалдар алқасы мен «Қоғамдық келісім» кеңесінің бастамасымен қолға алынған.
«Дүкен аптаның тек сәрсенбі күні жұмыс істейді. Мұнда қаланың 8 мөлтек ауданының көше комитетінің төрағалары жасаған тізімдер бойынша мұқтаж отбасыларға азық-түлік, киім-кешек қажетілігіне қарай берілетін болады. Нақтырақ айтқанда, әр аптада 40-50 адамға көмек көрсетілмек. Ол тізімге көпбалалы және тұрмысы төмен отбасылар енгізіледі», – деді облыстық ақсақалдар алқасының төрағасы Ж.Әзіретбергенов.
Қазіргі таңда дүкенде 2 тонна азық-түлік, 4 мың дана киім бар. Негізінен дүкеннің қоры қаладағы демеушілердің есебінен толықтырылады. Аталмыш дүкен қаладағы Әл-Фараби көшесі №26 үй мекенжайында орналасқан.
