Фестиваль таңғы жаттығумен басталды. Яғни, облыстағы мемлекеттік мекемелер мен білім беру, денсаулық сақтау ұйымдарындағылардың өкілдері, бас-аяғы мыңға жуық қатысушы жұмыс орындарында салауатты өмір салтын насихаттау мақсатында жаттығу жасады.
Түркістан облыстық салауатты өмір салтын қалыптастыру орталығының мәліметінше, фестиваль аясында велошеру де ұйымдастырылды. Велошерушілер Түркістан қаласындағы "Парасат" саябағынан Арбат демалыс аймағына дейін жүріп өтті.
"Денсаулық" фестиваліне қатысқан облыс әкімінің орынбасары Сәкен Қалқаманов, облыстық денсаулық сақтау басқармасының басшысы Мұқан Егізбаев "Денсаулық" қалашығындағы дәрігерлердің жұмысымен танысты. Одан өзге Қазақстан халқы Ассамблеясының ұйымдастыруымен облыстық этномәдени бірлестіктердің "Қазақтану" жобасы аясында «Қазақ дастарханы» ұлттық тағамдар көрмесін тамашалады.
Айта кетейік, "Денсаулық" қалашығында білікті дәрігерлер жергілікті тұрғындарды қабылдап, 500-ге жуық азаматқа тегін медициналық қызмет көрсетті.
