Түркістанда кәсіпкерлерге басым жобаларды жеңілдікпен несиелендіру бағдарламасына қатысу шарттары туралы ақпараттандыру жұмыстары басталып кетті деп хабарлайды Elitar.kz тілшісі.
Облыстық кәсіпкерлер палатасына банк секторының өкілдері, қаржы институттары мен өңір кәсіпкерлері жиналды.
«Қарапайым заттар экономикасы» деп аталтын палата жанынан құрылған жобалық алқа қазіргі таңда ішкі нарықта жетіспейтін отандық өнімдерді, қазақстандық өндірістің тұтыну тауарларын өндіруді ұлғайту мақсатында жұмыс істеп жатқан кәсіпкерлер мен бастаушыларға жан-жақты қолдау көрсетеді.
Кездесуді ашқан Түркістан облыстық кәсіпкерлер палатасының директоры Дінмұхамед Әбсаттаров атап өткендей, жаңа бағдарлама соңғы өнім өндірісі мен басым жобаларды несиелендірудің қолжетімділігі міндеттерін шешуге бағытталған.
Қаржыландыру алу үшін кәсіпкер банкке өтінім жіберіп, қажетті бағалау және келісу рәсімінен өтіп, «Даму» кәсіпкерлікті дамыту қорына жүгіну қажет.
Бөлінген 600 млрд теңгенің 400 млрд теңгесі өңдеу өнеркәсібі мен қызметтерге, ал ауыл шаруашылығы өнімдерін өндіруге 100 млрд теңгеге дейін, сондай-ақ ауыл шаруашылығы өнімдерін қайта өңдеуге 100 млрд теңгеге дейін бағытталады. Бағдарламада 15%-дан аспайтын мөлшерлеме бойынша қарыз алушыларға несие беру тетігі қарастырылған, оның 8%-ын жеке кәсіпкерлік субъектісі төлейтін болады. Қалған айырмашылықты мемлекет жеті жылға дейін өтеу мерзімімен субсидиялайды. Жобалардың нысаналы мақсаты-бұл инвестициялар және айналым қаражатын толықтыру. Жобаның нысаналы мақсатын растау үшін тізбеден кемінде бір тауарды шығару жеткілікті. Несие теңгемен беріледі, бір қарыз алушыға қаражат шектеусіз беріледі.
Барлық келіп түскен жобаларды сүйемелдеу бойынша Жол карталары жасалады. Жобаларды қаржыландыру жобалық кеңсенің базасында қадағаланатын болады.
