Жоғалған малдарды өз бетімен іздеп таба алмаған тұрғындар полицияның көмегіне жүгінген.
Келес ауданының полиция бөліміне 17 ұсақ мал мен 2 ірі қараның жоғалғанын айтып, жергілікті тұрғындар арызданған. Бұл жайтты полицейлер ҚР ҚК-нің 188-бабы "ұрлық" бойынша СДТБТ-ға тіркейді. Жәбірленушілерге келтірілген залалдың жалпы сомасы 1,5 миллионға жуық теңгені құраған.
Аудан тұрғындарының күнкөріс көзіне айналған малдарын жымқырып, әбден мезі еткен күдіктілерді құрықтау үшін полицейлер түнгі жорықтарды жиі ұйымдастырып, ауыл аймақты аралап, тінту жұмыстарын күнделікті жүргізеді. Ақыры аталған жайттарды іске асырған екі күдікті ұсталады.
"Белгілі болғандай олар бірнеше рет мал ұрлап, одан түскен пайдаға жеңіл көлік сатып алған. Содан соң ол көлікті тағы да басқа ұрлық әрекеттеріне пайдаланған. Осылайша олар алған көліктеріне орта салмақты ірі қараларды, бірнеше ұсақ малдарды салып алып, облыстың басқа аудандарының базарларында сатып отырған. Ұсталған екі күдіктінің бірі Сарыағаш қаласының тұрғыны бұрын «Тонау», ал екіншісі Жетісай ауданының тұрғыны «ұрлық» баптарымен сотты болған. Аталған істі тексере келе полицейлер екі күдіктінің ұрлаған малдарын сатып алып отырған сатушыны да ұстады.
Қазіргі таңда күдіктілер қамауда" делінген Түркістан облыстық Полиция департаментінің баспасөз қызметі берген мәліметте.
Полицейлер күдіктілердің өзге де қылмыстық істерге қатысы болуы мүмкін екендігін жоққа шығармайды. Сондықтан сотқа дейінгі тергеу амалдары жалғасуда. Тәртіп сақшылары соңғы ұрланған 3 ұсақ малды тәркілеп, заңды иелеріне қайтарып берді.
