Түркістан қаласында «Мерейлі отбасы – 2019» ұлттық байқауының облыстық кезеңінің жеңімпаздарын марапаттау рәсімі өтті. Салтанатты шараны Түркістан облыс әкімдігі және Түркістан облысының отбасы, балалар және жастар істері жөніндегі басқармасы ұйымдастырды, деп хабарлайды ТО әкімінің баспасөз қызметіне сілтеме жасай отырып Elitar.kz.
2019 жылы 24 мамыр күні Түркістан облысының«Мерейлі отбасы –2019» ұлттық сайысының жеңімпаздарын анықтау бойынша комиссия отырысы өткен болатын. Бұл байқауға 16 аудан, қаладан 58 отбасы бақ сынап, 30 отбасы үздік деп танылған.
Елбасы Нұрсұлтан Назарбаевтың бастамасымен дәстүрге айналған «Мерейлі отбасы» ұлттық байқауының биылғы облыстық қорытынды кезеңінде облыс әкімі Өмірзақ Шөкеевтің Алғыс хатымен барлық 28 отбасы (лауреаттары) марапатталып, олардың әрбіріне 200 000 мың теңге қаржылай сыйлық берілді. Ал Шардара ауданынан Қарсыбаевтар, Бәйдібек ауданынан Еркебаевтар отбасының әрқайсысы 1 000 000 теңге ақшалай сыйлыққа ие болды.
«Мерейлі отбасы – 2019» конкурсында екі жанұя жеңімпаз деп танылды. Олар қыркүйек айындағы отбасы күніне орай өтетін республикалық байқауға жолдама алды.
Айта кетейік, «Мерейлі отбасы» ұлттық байқауы адамгершілік құндылықтарды қайта жаңғыртуға, отбасы мәртебесін көтеруге бағытталған. Мақсаты – отбасы институты, адамгершілікті, бала тәрбиесіндегі ата-ананың жауапкершілігін, отбасы құндылықтарын насихаттау, ата-аналарға қамқорлық жасауға үгіттеу.
