Төтенше оқиға бүгін кешкі сағат 18.45-тер шамасында Түркістан қаласындағы Бекзат Саттарханов көшесі бойындағы "ROYAL GRAND HOTEL" қонақ үйінде орын алды, деп хабарлайды Elitar.kz.
Төтенше жағдайлар комитеті баспасөз қызметінің мәліметінше, алғашында қонақ үй аумағында газ баллондарын тасымалдайтын "ЗИЛ" автокөлігі өртенген. Салдарынан баллондардың бірі жарылған.
Жарылыс ғимараттың оң жақ бетінен басталып, кейін шатырына тараған.
Өртпен күресуге Түркістан облыстық Төтенше жағдайлар департаментінің жеке құрамынан 70 адам мен 14 техника жұмылдырылды.
Түркістан облыстық Полиция департаменті баспасөз қызметінің жетекшісі Салтанат Қаракөзованың мәліметінше, қазіргі таңда ғимарат қоршауға алынып, оқиға орнында полицейлер мен төтеншеліктер жұмыс жасауда. Оқиғаның шығу себебін анықтау мақсатында тиісті сараптамалар тағайындалды.
Қазіргі таңдағы ақпарат бойынша оқыс оқиға салдарынан қаза болғандар мен зардап шеккендер жоқ.
