Түркістанда үшем босанған екі ана перзентханадан шығарылды. Бір айдың ішінде екі үшемнің өмірге келуі облыс орталығында алғаш рет тіркеліп отыр, деп хабарлайды ТО денсаулық сақтау басқармасының баспасөз қызметіне сілтеме жасай отырып Elitar.kz.
Түркістан облыстық №3 перинаталдық орталықта босанған Динара Нарханова үш ұлды өмірге әкелді. 1 мамыр күні мерзімінен ерте босанған 27 жастағы келіншектің нәрестелері 1 820 гр, 1800 гр, 1730 гр болған. Қазір нәрестелердің салмақтары екі келіден асқан. Бұған дейін бір қызы бар отбасының перзенттері осылайша төрт балаға көбейді.
Ал екінші үшемдерді босанған Сайера
Туклиева 29 жаста. Екі қыз бен бір ұлды
өмірге әкелген жас ананың үйінде тағы
үш перзенті бар. Нәрестелері де айы
күніне толып, бүгін өз үйлеріне жіберілді. 
«Үшемдерге
жүкті екенімді бесінші аптада білдім.
Үй-ішімізбен қуандық. Ерекше күтім
жасап, дәрігерлердің айтқанын тыңдадым.
Дәрігерлерге алғыс айтқым келеді, бізге
жақсы ем-дом жасап, жақсы қарады. Есімдерін
Фатима, Исмайл, Зухра деп қойдық. Осылайша
өмірге үш перзент әкеліп, батыр ана
атандым»,- дейді Сайера Туклиева.
Бүгін қос ана мен нәрестелеріне облыстық әкімдіктің атынан сый-сыяпаттар жасалды. Әр нәрестеге арба мен кереуеттер, киім-кешектер мен ойыншықтар табысталды.
Облыстық денсаулық сақтау басқармасының басшысы Мұқан Егізбаев сәбилердің алдағы уақытта да ерекше күтімге алынатынын айтты.
«Қазіргі
таңда нәрестелердің барлығының жағдайы
жақсы. Бастапқы кезде салмақтары аздау
болғандықтан, оларды дәрігерлер
қарауларына алды. Медициналық күтім
жасап, бүгін үйлеріне жақсы жағдайда
шығарып жатырмыз. Бұдан былай әр отбасына
медибике бөлінетін болады»,-деді Мұқан
Егізбаев.
