Оқиға Түркістан облысы, Бәйдібек ауданында орын алған. Жергілікті тұрғын полицейлерге шағымданып, үйіне ұры түскенін хабарлаған.
Облыстық Полиция департаментінің мәліметінше, оқиға орнына жеткен жедел-тергеу тобының қызметкерлері түнгі уақытта жәбірленушінің үйіне белгісіз тұлға кіріп, жатын бөлмесінен 10 мың теңге ақшасын ұрлап кеткенін анықтады. Оған қоса ұры үстел үстінде тұрған жинақ сандықшаның (копилка) ішіндегі 15 мың теңгені де жымқырған. Аталған жайт бойынша ҚР ҚК-нің 188-бабы (Ұрлық) бабымен қылмыстық іс қозғалды.
Қылмыс болған орыннан криминалистер саусақ іздерін және аяқ киімнің іздерін алды. Тәртіп сақшылары жақын маңдағы аумақтарды аралап, көршілер мен куәгерлерден жауап алып, басқа да қажетті шараларды жүзеге асырды.
Полицейлердің жедел-іздестіру іс-шараларының нәтижесінде күдікті ұстал. Ол жәбірленушінің ауылдасы болып шықты. Анықталғаны, күдікті түнгі уақытта жәбірленушінің үйіне терезе арқылы кіріп, жалпы көлемі 25 мың теңге ақшаны қолды еткен. Ұрлаған ақшаны өз қажеттілігіне жұмсаған. Қазіргі уақытта аталған жайт бойынша сотқа дейінгі тергеу амалдары жүргізілуде.
