29 наурыз, 12:50
ҚР Президенті Қасым-Жомарт Тоқаев Премьер-министр мен Түркістан облысының әкіміне Леңгірдегі жертөлесін дәретхана қалдығы басқан көпқабатты үй тұрғындарының мәселесін шешуді тапсырды. Мемлекет басшысы бұл туралы Twitter парақшасында жазды.
«Премьер-министр мен Түркістан облысының әкіміне Леңгірдегі көп пәтерлі үй тұрғындарының күрделі жағдайын шұғыл шешуге тапсырма бердім» делінген Президенттің мәлімдемесінде.
Мемлекет басшысы бұған қоса 31-телеарнаның «Информбюро» жаңалықтар бағдарламасында 28 наурыз күні шыққан сюжеттің сілтемесін жариялады. Онда сол үйдің тұрғындары өздерінің проблемалары туралы айтқан.
«Жалға алынған 60 пәтерлі үйде негізінен мүгедектер мен көпбалалы отбасылар тұрады. Олар ұзақ жылдар бойы шенеуніктерге кәріз жүйесінің проблемасын шешіп беруде көмек сұрап келген. Дегенмен, нәтиже жоқ», - делінеді сюжетте.
Үй тұрғындары тілшілерге ҚР Президеті Әкімшілігіне шағымданатындарын да айтқан. Өйткені жергілікті биліктен көмек жоқ. Бейнесюжет эфирге шыққан күннің ертеңіне Мемлекет басшысы осы проблеманы бақылауға алып, шешуді тапсырды.
