Дәрігерлер Түркістанда жарылыстан зардап шеккендердің жағдайлары туралы айтты, деп хабарлайды Elitar.kz.
Аурухананың бас дәрігері Жанболат Ділдәбековтың айтуынша, 10 қыркүйекте ауруханаға шұғыл түрде 5 адам түскен. Жарақаттанып, терісі күйік шалған үш науқас травматология бөліміне жатқызылды. Бір пациент жансақтау бөлімінде. Қазір науқастардың жағдайы орташа ауыр.
"Кеше реанимация бөліміне жатқызылған науқас бүгін бөлімшеге көшіріледі. Оның жағдайы жақсаруда", - деді бас дәрігер.
Облыстық қоғамдық денсаулық сақтау басқармасы баспасөз қызметінің мәліметінше, Түркістан облысына іс-сапары барысында Денсаулық сақтау министрі Елжан Біртанов Ішкі істер министрімен бірге қонақ үйінің аумағында болған жарылыстан зардап шеккен науқастар ем қабылдап жатқан қалалық орталық ауруханаға барды.
Бас дәрігер Ділдәбеков министр Біртановтың науқастарға республикалық клиникалардан көмек қажет пе деген сұрағына оларға жергілікті медицина мекемесінде қажетті емдік шаралардың барлығы жүріп жатқанын және оларға келер қауіптің жоқтығын атап өтті.
Еске салсақ, кеше кешкі сағат 7-де Түркістан қаласындағы "Гранд Роял" қонақ үйінің аумағында газ баллонын тиелген "ЗИЛ" маркалы машинасы жарылып, салдарынан 11 адам жараланды. Алты науқасқа алғашқы көмек көрсетіліп, амбулаторлық ем алуда. 5 адам ауруханаға жатқызылды.
