Коронавирус індетіне қарсы күресті күшейту, көмекке мұқтаж тұрғындарды қолдау мақсатында Түркістан облысының кәсіпкері, «Ордабасы құс» ЖШС-нің директоры Мұрат Тағаев 2800 келі күркетауық еті өнімі ұсынып, демеушілік көрсетті.
«Мемлекет тарапынан қауіпті індетті таратпау, тұрғындардың әл-ауқатын көтеру үшін ауқымды жұмыс атқарылып жатыр. Дегенмен мұндай кезеңде әрбір азамат қолдан келгенше елге көмектесуі керек деп есептеймін. Біз бұл қиындықты бірлік пен тәртіп арқылы жеңеміз», – дейді Мұрат Тағаев.
«Nur Otan» партиясы Түркістан облыстық филиалының баспасөз қызметінің мәліметінше, іскер азамат күркетауық етінен әзірленген шұжық және өзге де өнімдерді партиялық жобалар аясында әлеуметтік аз қамтылған тұрғындарға тарату үшін «Біз біргеміз!» акциясының үйлестірушілеріне ұсынды. Жалпы өнімнің құны 2 млн теңгені құрайды. Партия өкілдері мен еріктілер, «жасотандықтар» бұл етті аудан, қалаларда тізімдегі отбасыларға үлестіретін болады.
