Тәжікстан азаматы Қазақстан аумағы арқылы Өзбекстаннан Ресейге өтпекші болған.
Ер кісі Түркістан облысы бойынша Мемлекеттік кірістер департаментімен Түркістан облысы бойынша Экономикалық тергеу департаментінің және Қазақстан Республикасының Ұлттық қауіпсіздік комитетінің шекара қызметкерлерімен бірлесе жүргізілген тексеру барысында "Жібек жолы" кеден бекетінде ұсталды.
Департаменттің баспасөз қызметі хабарлағандай, кедендік тексеру кезінде "Ынтас" және "Рига" есімді қызметтік иттердің тінту, іздеу жұмыстары нәтижесінде күмәнді заттар табылған. Бұдан кейін кешенді инспекциялық іздестіру аппараты іске қосылған. Қызметкерлермен бірге күмәнді заттардың жасырынған жері анықталып, Kabut Afganistan R.C.C. деген жазуы бар 12 кг құрайтын 12 қалта табылды. Экспертизалық жұмыстар көрсеткендей қалталарда 12 кг есірткі болған.
Айта кетейік, осыған ұқсас оқиға 29 маусым күні Атамекен кедендік бекетінде де орын алған болатын. Онда автокөлігінен жалпы салмағы 1 929,09 гр құрайтын есірткі заттар табылған Тәжікстан азаматы ұсталған еді.
