Шұғыл: Қызылорда облысында Қорғаныс министрлігінің тікұшағы апатқа ұшырады

27 наурыз, 21:06

Қызылорда облысында Қорғаныс министрлігінің тікұшағы апатқа ұшырады, деп хабарлайды Elitar.kz ведомствоның баспасөз қызметіне сілтеме жасап. Бортта 12 адам болған.

Тікұшақ белгісіз жағдайда құлап, толық өртеніп кетті.

"2019 жылдың 27 наурызы күні ҚР ҚК ӘҚК әскери-әуе күштерінің тікұшағы апатқа ұшырады. Оқиға орнынан алдын ала мәлімет бойынша, мерт болғандар бар. Жарақат алғандардың саны нақтылануда. Тікұшақ 4 әскери тікұшақ тобының құрамында Ақтаудан Шымкентке бет алған. Ұшу кешенді тексеру мен арнайы құрылымдардың "Алтын жебе" оқу-жаттығуы аясында, қараңғы уақытта және күрделі ауа райында жүзеге асырылған", - делінген хабарламада.

Апат орнына қорғаныс министрі Нұрлан Ермекбаевтың бұйрығымен құрылған арнайы комиссия аттанды.

Төрт тікұшақтың екеуі Қызылордаға қонып, біреуі апат орнына қайтып оралды.

Апаттың себеп-салдарын Қорғаныс министрлігі Ішкі істер министрлігімен бірге тексереді.

ІІМ ТЖК өкілдері хабарлағандай, 27 наурыз күні сағат 17:35-те "112" пультіне Қызылорда облысының Жалағаш ауданында МИ-8 тікұшағы апатқа ұшырағаны туралы хабарлама түскен.