Украина Президенті Владимир Зеленский коронавируспен күресте қажетті гуманитарлық жүкті жеткізуге көмек көрсеткені үшін Қазақстанға алғысын жеткізді.
Владимир Зеленский Қазақстанның Украинадағы елшісі Дархан Кәлетаевпен кездесуде Қазақстаның Қытайдан Украинаға медициналық жүктерді жедел жеткізуге көмектескенін атап өтті. Зеленский өз сөзінде Украинаның Қазақстанды Орталық Азиядағы маңызды және уақыт сынынан өткен серіктес деп санайтынын айтты.
Кездесу кезінде екі ел арасындағы ынтымақтастық, сондай-ақ қазіргі жағдайдағы өзара көмек мәселелері талқыланды.
Естеріңізге сала кетейік, 12 сәуір күні әлемдегі ең үлкен Ан-225 жүк ұшағы Алматы әуежайына жанармай құю үшін қонған еді. Ұшақ Қытайдан Украинаға гуманитарлық көмек жеткізді.
