Сарыағаш АПБ-нің қызметкерлері бөтеннің мүлкін ұрлаудың жолын кесу аясында ұйымдасқан жедел профилактикалық іс-шаралар өткізіп, тек қана облыс көлемінде емес, Шымкент қаласында да пәтер тонауды кәсіп қылған ер адамды құрықтады. Бұл туралы Түркістан облыстық ПД баспасөз қызметіне сілтеме жасай отырып Elitar.kz хабарлайды.
Жыл басынан бері Сарыағаш АПБ-нің кезекшілеріне жергілікті тұрғындардан өз үйінен ақша мен бағалы заттарды ұрлағандығы туралы ондаған шағымдар түскен. Оның ішінде бір жәбірленуші ұрының үйіне терезе арқылы түсіп, 2 мың доллар ақшасы мен бағалы заттарын ұрлап, 1 500 000 теңге көлемінде шығын келтіргендігін хабарлаған. Аталған жайт сотқа дейінгі тергеп-тексерудің бірыңғай тізіліміне «Ұрлық» ҚР ҚК-нің 188-бабы бойынша тіркелді. Аталған қылмысты ашу мақсатында полиция бөлімінде тәжірибелі қызметкерлерден жедел іздестіру тобы жасақталды.
Нәтижесінде полицейлер үй ұрысын Шымкент қаласындағы көшелердің бірінен қолға түсірді. Ол бұрын да бірнеше рет ұрлық жасағаны үшін сотты болған Сарыағаш ауданының тұрғыны болып шықты. Тергеу барысында ұсталған ер адамның Сарыағаш ауданы мен Шымкент қаласында шамамен 20 пәтер ұрлығына қатыстылығы анықталды. Бұлтартпас айғақ ретінде полицейлер терезеден саусақ іздерін алды, ұрланған заттар мен қолғаптарын тәркіледі.
Қазіргі
таңда аталған жайт бойынша ҚР ҚК-нің
«Ұрлық» 188-бабы бойынша іс қозғалып, сотқа дейінге тексеру амалдары жүргізілуде.
Күдікті тұтқындалды. Ұрланған заттардың
бір бөлігі заңды егесіне қайтарылды.
