Қытай елінің Қазақстандағы Елшісі Чжан Сяо қазақстандықтардың қытай кәсіпорындарының салынуына қатысты қарсы митингтер туралы пікірін білдірді, деп хабарлайды NUR.KZ-ке сілтеме жасап Elitar.kz.
Порталдың хабарлауынша, Елші митинг қатысушыларының "Қытай аумақты басып алып, халқын осында көшірмек" деген пікірі орынсыз екенін атап өткен.
"Болып жатқан жағдайлар жөнінде хабардармын. Митингтер өткеннен кейін Сыртқы істер министрлігінде брифинг болып, менің әріптестерім 55 жобаның қайдан шыққаны, олардың мемлекеттік сараптамадан қалай өтіп жатқаны, бірлескен комиссия әрбір нақты жобаны қалай іріктейтіні жөнінде толық түсініктеме берді", – деді Чжан Сяо.
Сонымен қатар Елші өз сөзінде жобалардың бірімен танысып қайтқанын да сөз етті. Ол - Шымкенттегі мұнай өңдеу зауыты. Аталған кәсіпорын кеңес үкіметі кезінде салынған. Тозығы жеткен зауыт толығымен жаңарып, нәтижесінде Қазақстан сапалы отандық жанармай өнімімен тек өзін емес, көршілес елдерге экспорттай бастағанын да жеткізді.
Ал Қазақстанда болып жатқан наразылық митингтер екі ел: Қазақстан мен Қытай арасындағы байланыстың дамуына қарсы қойылғанын, арандатушы күштердің болу мүмкіндігін атап өтті.
"Бұл митингтердің артында халық арасында Қытайға қарсы жағымсыз көзқарас тудыруды, екіжақты қарым-қатынастың дамуына кедергі келтіруді, жұртты арандатып, от жағуды көздейтін белгілі бір күштер тұруы мүмкін.
Ондайлардың әрекеттері алға баспайтынын айтқым келеді. Себебі ондай әрекеттер тек өзімшіл геосаяси мүдделерден туындайды",-деді ол.
Еске салсақ, әлеуметтік желілерде "Қазақстанға 55 қытай зауытын көшіру" жайлы ақпарат пайда болды. Оны естіген қазақстандықтар еліміздің бірқатар қалаларында алаң мен әкімдік ғимараттарына келіп, наразылық танытты.
ҚР СІМ бұл ақпараттың шындыққа жанаспайтынын ресми мәлімдеді.
ФОТО: Elorda Aqparat
