Шымкентте компаниялардың бірінде жұмысшылар басшылық тарапы шетелден заңсыз келетін жұмысшылардың көптігінен жергілікті жұмысшылардың қызметінен бас тартқанын айтып шағым түсірген. Бұл туралы ҚР Көші-қон қызметі комитеті төрағасының орынбасары Сабыржан Сейітжанов Кәсіпкерлердің құқығын қорғау және сыбайлас жемқорлыққа қарсы іс-қимыл жөніндегі кеңестің отырысында мәлімдеді.
«Күні кеше «Шымкент крепеж» ЖШС-де қазақстандық жұмысшылар жиналып, компанияның олардың қызметінен бас тартқанына наразылық білдірді. Нарызылық танытқандар Шымкент пен Түркістан облысының тұрғындары. Олардың айтуынша, жергілікті кәсіпорында Қытай, Қырғызстан, Өзбекстан азаматтары заңсыз жұмыс істеп жүр. Осы жағдайдан соң біздің мамандар дереу оқиға орнына барып, тексеру жүргізді. Жұмысшылардың айтқандары рас болып шықты», - деген Сабыржан Сейітжанов ел аумағына заңсыз кірген азаматтардың жауапқа тартылғанын атап өтті.
"Мен мұны не үшін айтып отырмын, егер біз тексеру жұмыстарын алдын ала ескертетін болсақ, онда кей кәсіпкерлер заңсыз жүрген жолаушыларын алдын алып тастап, жауапкершіліктен жалтарудың жолын қарастыратын болады. Бұл біздің тексеру шараларымыздың нәтижелігіне кері әсерін тигізеді",-деді ол.
