ҚР Жоғарғы Сот Төрағасы Жақып Асанов Түркістан облысына арнайы іссапармен келді. Сапар барысында ол «Nur Otan» партиясы облыстық филиалының «Open Space» форматында ашылған Қоғамдық қабылдау кеңсесінің жұмысымен танысты.
Түркістан облысы әкімдігінің баспасөз қызметінің мәліметінше, қала орталығында орналасқан кеңседе өңір тұрғындары электронды түрде арыз-шағымын тіркетіп, тиісті жауабын ала алады.
Қонақтарды қоғамдық қабылдау кеңсесімен партияның облыстық филиалы төрағасының бірінші орынбасары Бейсен Тәжібаев таныстырып, атқарылып жатқан жұмыстарды баяндады.
Мұндай форматтағы қабылдау облыс басшысы Өмірзақ Шөкеевтің бастамасымен ашылып отыр. Он күннің ішінде «Open Space» форматында ашылған қоғамдық қабылдауға 184 азамат өтініш білдірген. Сондай-ақ дәл осы жерде аймақ басшысының өзі де халықпен кездесіп, олардың мәселесін шешуге ықпал ететін болады.
ҚР Жоғары сот төрағасы облыс әкімі Өмірзақ Естайұлының бастамасымен ашылған Түркістан облысының аймағын дамыту жобалық кеңсесінің жұмысымен танысты. Жобалық кеңсе бүгінде 2 мыңнан астам жобаны іске асыруда. Мұндағы жұмыс барысымен танысқан еліміздің бас судьясы дәл осындай орталықтардың санын арттырып, алдағы уақытта жастарды көбірек жоба жасауға тарту керек екенін айта өтті.
Жақып Асанов Түркістан облысына жасаған сапары барысында аймақ басшысы Өмірзақ Шөкеевпен бірге облыстық сот ғимаратының іргетасын қалады. Жоспарға сәйкес, жобаның құрылысы 2021 жылы аяқталады.
ФОТО: ТО баспасөз қызметі
