Жетісайда денелері көкала қойдай болып, тіпті пышақ жарақатын алған бір үйдің мектеп жасындағы үш қызына қорлық көрсетті деген күдікке ілінген өгей ананың екінші перзентіне аяғы ауыр болып шықты. Бұл туралы Жетісайда ауданы әкімінің кеңесшісі әрі баспасөз хатшысы Айдар Сейдазым айтты.
Әкімдіктің ресми өкілі қыздардың туған анасы күйеуімен ажырасып, перзенттерін әкелеріне қалдырып кеткенін, ал өзі Шымкентте тұрып жатқанын мәлімдеді. Үш қыздың әкесі 2016 жылы екінші рет шаңырақ көтеріп, араға бір жыл салып ұлы дүниеге келеді.
"Ер кісі қыздарының бұлайша қорлық көріп келгенінен бейхабар болдып деп отыр. Себебі жұмыста болған. Қазіргі таңда үш қызбен психологтар жұмыс істеп жатыр. Олар азаптаған келіншектің тиісті жазасын алуын тілеп отыр",-деді әкімдік өкілі.
Еске салсақ, бұған дейін әлеуметтік желілерде Жетісай ауданында отбасылардың бірінде болған жаға ұстатарлық оқиға туралы ақпарат тарады. Онда денелеріне жан түршігерлік қорлық белгілері байқалған оқушы қыз екі бауырымен бірге өгей шешесі пышақ, ине, кемпірауызбен (плоскогубцы) зәбір көрсеткенін айтқан.
Қыздардың жағдайы туралы алғаш болып хабардар болған мектеп мұғалімдері полицияға хабар беріп, ондағылар өгей ананың үстінен іс қозғады.
Бұл жағдай ҚР БҒМ, ІІМ, Бас прокуратураның бақылауына алынды.
