Түркістан облысы, Жетісай ауданында өгей шешемізден зәбір көрдік деген бір үйдің апалы-сіңлілі үш қызының оқиғасына қатысты жаңа дерек шықты. Бұл ақпаратпен қыздардың әкесінің жеңгесі, яғни, өгей шешенің абысыны бөлісті.
Келіншектің айтуынша, зәбір көрген жасөспірімдердің әкесі жағындағы туыстары олардың көк ала қойдай болып жүргенін бұған дейін де көрген. Талай рет ол отбасыға барып, араша да түспек болған.
«Біз бірнеше рет барғанбыз. Қыздар: «Келмеңіздерші біздің үйге, өз өмірімізді өзіміз сүреміз» деп айқайлап жылайды. Әбден үйретіп қойған ғой. «Не үшін көгереді?» деп сұрасақ, "Өзара ойнап жүріп төбелесіп қалдық дейді» деген келіншек қыздардың әкесі ол үйге жолатпағанын айтты.
«Біз ол үйге талай рет барғанбыз. Қайным «мені ажырастырмақшысыңдар, қыздарымды жылатып отырсыңдар» деп бізді үйінен шығарып тастайтын. Тіпті кейде үйіне кіргізбей қоятын. Негізі қайным (автор: үш қыздың әкесі) бірінші әйелі кетіп қалған соң 4 жыл бойдақ жүрді. Ол кезде қыздар енеміздің және қайным мен қайын ағамның қамқорлығында болды»,-деді өгей шешенің абысыны.
Қыздардың әкесі екінші рет шаңырақ көтергенде туыстары үш перзентін өздерінің қамқорлығына алып, оған жаңа отбасымен жаңа өмір бастау керектігін айтқан екен. Бірақ ер кісі үш қызсыз өмірін елестете алмайтынын және қыздарына бас-көз болатын әйел азаматы қажет болғандықтан екінші рет үйленгенін айтқанға ұқсайды.
Еске салсақ, күні кеше Жетісайда тұратын жергілікті отбасы оқиғасы күллі елді дүрліктірді. Әлеуметтік желілерде бір үйдің үш қызының бірінің бауырларыммен бірге өгей шешемізден қорлық көрдік деген видеосы тарап кетті. Артынша күдікке ілінген өгей ана қамауға алынды. Басты күдікті болып танылған келіншектің екінші перзентіне аяғы ауыр.
Сәл кейінірек қыздардың туған анасы оларды тастап кетті деген ақпарат шықты. Алайда үш қыздың анасы бұл ақпаратты жоққа шығарды. Айтуынша, күйеуі теріс дінге кіріп кетіп, оны үйден қуып шыққан.
Ең сорақысы, күйеуінің бірінші некесінен туған қыздарға қорлық көрсетті деген келіншектің азаптау тәсілдерін жоспар дәптеріне жазып жүргені белгілі болды.
