Түркістан облысына қарасты Жетісай ауданында коронавирус жұқтырғандар санының артуына байланысты екі бірдей ауыл қоршауға алынып, дерттің таралмауына барынша күш салынып жатыр. Осы төтенше жағдайды ескерген Құрбан ата ауылының тұрғындары жаман індеттің алдын алу және қоғамдық тәртіпті сақтау мақсатында өз ауылдарының кіреберіс қақпасына блок-бекет орнатты.
"Бұндай жағдайға ел болып ақылдасып келіп отырмыз. Елдің әрбір адамының өмірі қымбат. Оның үстіне ауылымыз Жетісай қаласына жақын орналасқандықтан ауылға келімді-кетімді адамдар көп. Соның барлығын ескере келе осындай қадамға барып отырмыз дейді",- ауыл тұрғыны Досым Ахметов.
Бүгінде Құрбан ата ауылында 300 ден астам үй бар. Онда 2793 адам тұрады. Қазіргі таңда ауылға тіршілікті қамтамасыз ету мақсатында кіріп-шығатын көліктер тіркеуге алынып, түгелдей дезинфекциядан өткізілуде.
Бұл туралы облыс әкімдігінің баспасөз қызметі хабарлады. Еске салсақ, бүгінгі таңда Түркістан облысында коронавирус жұқтырғандар саны 28 адамға жетті. Оның 13-і бір ғана Жетісай ауданында тіркелді.
