Бұған дейін Elitar.kz порталы Түркістан облысы, Жетісай ауданындағы қайырымды жандардың төмен отбасыларға азық түлік таратып, енді бір кәсіпкер азаматтың көпбалалы отбасыға баспана сатып алып бергені туралы айтқан болатын.
Жетісайлық қайырымды жандар мұнымен тоқтап қалмақ емес. Аудандағы «Зекет» қорына келіп түскен қаржы мен жақсылық жасаушы өзге де азаматтардың демеушілігімен асарлату арқылы он екі отбасыға баспана салынып жатыр. Бүгінде алты коттедждің іргетасы қаланып қойған.
Үй салу үшін Қазыбек ауылдық округі әкімшілігіндегілер жер телімін берген. Он бөлмелі алты коттеджде он екі отбасыдан, яғни, әрқайсысында екі жанұядан тұратын болады. Мұндағы құрылыс жұмыстары аяқталған соң электр жарығы, су, көгілдір отын секілді барлық инфрақұрылымды тиісті мекемелер жүргізіп беруге уәде еткен. Жыл соңына қарай кілті табысталатын тегін баспана кімдерге бұйырады? Оны ауданға еңбегі сіңген, қайырымдылық шараларында жиі төбе көрсетіп жүретін он бір жаннан құралған алқа мүшелері анықтайтын болады.
Сонымен санаулы айлардан соң ауданның жомарт жандарының арқасында үйсіз жүрген тағы он екі отбасы қоныс тойларын тойлайтын болады. Айта кетейік, жетісайлық жақсылық жасаушы мейірімді жандар бұған дейін 8 отбасыға баспана сатып алып берген болатын.
