Шымкент әкімі Ғабидолла Әбдірахымов ел демографиясының артуына сүбелі үлес қосып жүрген аналарға осындай сый жасап отыр. Бұл туралы ол бүгін халықпен кезекті кездесуінде мәлім етті, деп хабарлайды Elitar.kz тілшісі.
Көпбалалы отбасылардың тұрмыс жағдайын жақсы түсінетінін айтқан Ғабидолла Әбдірахымов өзі де шеттей балалы отбасыдан шыққанын атап өтті.
"Менің әкем 10 ағайынды, анам 7 балалы отбасынан шыққан. Ал өзім 5 балалы отбасында дүниеге келдім. Сондықтан көпбалалы отбасылардың жағдайын жақсы түсінемін. Шымкент қаласында 31 мың көпбалалы ана тұрады. Оның 2220-сы алтын алқа, 6056-сы күміс алқа иелері. Қаладағы 3200 көпбалалы ананың тұрмысы нашар. Табыстары күнкөріс деңгейінен төмен" деген қала әкімі көпбалалы аналарды қолдау мақсатында шаһарда арнайы орталық ашылатынын айтты.
"Әкімшілік қызметін алатын орталық ашылады. Және онда тек көпбалалы аналарға қызмет көрсетілмек. Одан өзге 1 наурыздан бастап "Алтын", "Күміс" алқа мен "Батыр ана" 1,2-дәрежелі орден иелері көпбалалы аналарымыз қоғамдық автобуста тегін жүретін болады. Бұны 8 наурыз қарсаңында жасаған сыйлық деп қабылдаңыздар. Бұл бойынша әкімдік есебінен көлік компанияларына субсидия ретінде қаражат бөлінетін болады",-деді әкім. Сондай-ақ, қала басшысы есепті кездесуінде қала түгілі, республикада бұрын-соңды болмаған "Сен жалғыз емессің" жобасы бастау алғанын мәлім етті. Аталған жоба арқылы тағдырдың түрлі сынағына тап болып, қиын жағдайда түскен отбасыларға баспана салып беру мәселесі қарастырылады. Оған кәсіпкерлер демеушілік көрсетпек.
