Алматы облысының полицейлері екі айдан бері із-түссіз кеткен 22 жастағы бойжеткен Анастасия Галееваның мәйітін тапты. Бұл туралы облыстық полиция департаментінің ресми өкілі Көбейхан Нұрахмет мәлімдеді.
Бойжеткеннің денесі Іле ауданындағы Междуречинск ауылына жақын маңда табылған.
«Жоғалып кеткен Анастасия Галаееваның денесі Іле ауданындағы Междуречинск ауылына жақын арада каналдың шлюздерінің бірінен табылды. Мәйіттің Анастасия екенін оның туыстары растады. Бұл дерек бойынша сот медициналық сараптама тағайындалады», - деді департамент өкілі.
Қазір тергеу ісі облыстық полиция департаменті басшысының жеке бақылауына алынған. Ал бойжеткенді каналға лақтырып жібергенін мойындаған достары қазір ешқайда кетпеу жөнінде қолхат берген.
Естеріңізге салсақ, 22 жастағы ару ақпанның 9-ынан 10-ына қараған түні Алматы облысы, Жаңа Қуат коттедж қалашығындағы құрбысының үйіне кетіп сол күйі өз үйіне оралмаған. Кейінірек Анастасияның құрбысының үйінен сол күні түнгі сағат 23.30 шамасында шыққаны белгілі болды. Із-түссіз жоғалған бойжеткенді іздеу шараларын екі айға жалғасты.
